Android mobile phone ațanga youtube a video upload dan

http://wap.ucweb.com Emaw http://uc-browser-hd.en.uptodown.com/android/download Ah te a download theih Uc web ami i download dawn chuan download tih phe zeuh zeuh lo awm kha i thai chhoh keuh ang a,uc mini leh uc hd download na i hmu ang.click la, nghak deuh det la, download nimai. Chuan,uc hd ah chuan settings ah lut la,incognito browsing leh desktop site view kha on ve ve la,youtube ah sign in la,gmail in aw.upload kha click la,select file click leh la,i file upload na tur a lolang tawh mai ang. Gallery ami pawh upload theih vek e. Wifi i connect loh chuan 3g emaw 4g ah a theih ka ring.2g ah chuan a har deuh ang

RINGTU NUNKAWNG PART-6

RINGTU NUNKAWNG PART-6 ▣▣▣▣▣†▣▣▣▣▣ A hmasa a ka han sawilan duh chu hei hi a ni,ringtu nunah hian daipelh chang nei thei kan lo ni reng mai a,chuvang chuan chak reng tur a inngaih hi thil theihloh tawp a lo ni e.phur chang leh chak chang nei,peih châng nei leh peihloh leh phûr em em lemloh châng nei vek thei kan ni tih hi han sawilan hmasak ka duh a,kalsual châng leh daipelh(tihsual) châng nei thei vek kan ni tih leh tidik reng thei leh kaldik reng thei kan ni renglo.a chângin Thlarau pawlna sang tak kan chan laiin,a chângin hniam tak a kan tlâk leh hun te a lothleng a ni.kan sân viau lai leh Pathian Thu ringawt kan buaipui lai kha kan chaklai leh kan țhatlai ni a kan ngaih leh ti ve thei ni a kan inngaih lai te,Pathian hnaih riau a kan inhriatlai te a ni bawk.chuan chapona tlâng sang tak ah kan lo ding hma duh viau a,chaklo deuh te dâwmkângtu nih aiin an tihsual leh daipelh na ah kan hmusit duh viau a,kan chirh theh a,dâwmkãngtu nih aiin,kan sawisel zui a,an famkimlohna leh chaklohna kha kan sawiselsak a,an tihsual kan hmuh in sawiselna leh hmuhsitna in kan lo khat thuai a,anni ang tho kan ni tih hi kan inhre duhlova,kan hawisân khum ta mai a,i chakna chhan chu chaklote tan a țanpuitu ni tur leh chhawmdâwltu ni turin a ni.sang tak ah i chhawk hmawk palh ang e.i tihsual kha tilo mai la,tlânchhuah tum la, tilo la,hawisan hmak la Lalpan a ngaidam mai ang che kan inti châmchi a,hei hi dik viau ang a lang,dik em em silo a ni.an chakloh hun ah an lam hawi a, an lo chak theih nan a țawngțaisak aiin keimahni indahsâng chungin kan hmuhniam a,kan kalpel a, entleu chungin kan tlânchhiatsan ta țhin a ni.i tihloh tur i ti a,Lalpan i nun chapo kha a ten em em a,nakin ah anni ang dinhmun a rãwthniam in i la awm ve thuai mai ang.i chak a i inngaihlai kha Thlarau pâwlna sang tak i chanlai a ni a,Lalpa Thu chauh i nunah a lang in i tuipui thei ta mai chauh a ni. Awle,kan Thu tum ah han lût dâwn teh ang aw.chu veng pakhat a in pakhat ah chuan chhungkaw pakhat hi an awm a,chu mite chhungkua chu Pathian ngaihsak mi tak,ringtu țha tak kan tih ang hi an ni a, an tlangvalpa chu rawngbawlna a lokal tawh leh inhmang tak țhin a ni a,a hun kal ta ah chuan mite pawh Lalpa hnena lo hruaithleng ve tawhtu a ni. Chu in ah chuan kan han lut a, chu tlangvalpa nen chuan kan inkâwm ta a ni.a chanchin chu tihian duhthaw tak leh sawichhuah nuam titak in mi han hrilh melh melh ta a,mi hrilh lai chuan ka hnuk a ti ulh hial mai a ni.a hun kal ta chanchin ah chuan rawngbawlna a theihtâwp a a lo inhman tawhzia leh a tun hun inthlauh si zia te,a nun sual a lokhat leh ta,sual in a diriam a, Lalpa tih nge,sual tih nge,ama duhthu erawh ka sawi theih a nilo.ka hre miaulo tlat.Lalpan a kawng thu atana a loruatlâwk reng a nih palh chuan ka sawi dan tur,ama thu a sual a tlu ka tih kha a dik hauh dawnlo a ni. LALPAN engkim a hre tlat a ni. Lalpa kutah ka dah a ni.a nun kha ka sawisak theilo tlat. Engkim hretu ka nilo a ni. Chuan tihian mi han hrilh ta zel a,ka hun kal ta kha ka ngai țhin a,keimah a talchhuah duh mahila,ka theihna in a tlin hauhlo,ka ngamloh leh choloh in mi diriam tlat si a,ka thin hi a rim hle a,min diriamtu sual chu hmuh theih a han beih vak mai ka nâp a,ka hneh dawnloh chhiava zia pawh ka hria.ka tum in talchhuah ka tum vawi tam a,ka hlawhchham zel si.ka mang a ang tak meuh meuh a ni.keimah tak chuan Lalpa lam chu ka duh ber a ni a,ka theihna in a tlin hauh silo a ni. Chutia ka hun kal ta a rawngbawl a ka inhman vanglai chuan min fakdertu hi ka ngah ve țhin khawp a,min hmu țhatu lah an tam ve e.mahsela,ka hun lokal zel ah peihlohna leh inthlahdahna a lothleng a,ka tihrâm hrâm zel na a,ka chakna leh theihna in a tlinloh hun a lothleng a,ka tlûk hun a lothleng ta nge nge a ni,chutia ka han tluchhe ta chiah chu Lalpa lamah ka khua hi a har em em mai a,ka lung a leng veng veng mai a,tihreh tumin ruihhlo lamah kan tlân a,chu khawharna chu mipat hmeichhiatna lamah te tihreh theih inbeiseiru tak chung chuan intihhlim ka tum a, nawmsakna lam,khawvel lamah ka han tlân a,ka nunruak chu a hma aimah in a ruak zual deuh deuh mai ta a,reilote chu ka nun a nuam ve na in a lo rei hnu chuan a aia khawharna hlir in ka lokhat leh zel si a,puitu ka ngai a,tumah an awm silo, a hma a ka lanțhatlai, Lalpan hmunsang tak a min vawrhchhoh lai a min fakder vetute khan ka han tlâkchhiat hnu chuan min kalsan in,min rauhsan ta vek emaw tih tur hi a ni.a reh hian a reh tlawk tlawk mai a ni.Lalpa ka au țhin,chhângtu awmlo ang hial hian a reh tlawk tlawk mai a, thlaler ramro ah ka lokal reng mai tih reng ka hrelo.a ro hian ka ro hle a,ka tuihnâng thei hauhlo. Ka țawngțai lah a ro hulh vek mai a ni.ka kawng thlan nge,ka kalna tur dik tak ka zawh zel zawk tih pawh ka hrethiam theilo.ka mang hi a ang hle mai a ni tiin a sawi a,keichuan ngun takin ka lo ngaithla a,engtia han tih tur nge ka hre theilo,thu han hrilh chiam chiam lah a sâwt ber kher ang em ka inngaihtuah buai hle a,a tâwpah chuan tirawh,i țawngțai dun tawp teh ang aw.kei hian ka chhandam theilo che a,Lalpa chhandamna chu nghak tawp la,i awm ang ang khan Lalpa chhandamna chu nghak tawp mai rawh,i chaklohzia leh i theihlohzia te,engmah inihlohzia leh Lalpa chauh i ngaihzia leh i nun engkim kha tuma hriatloh in Lalpa hnenah hrilh rawh.a hun chu ka sawi thei lova,hmanhmawh suh la,Lalpa thiltih i chunga lothleng tur chu nghak fan fan ringawt mai rawh.a hun a tih ah Lalpan a khaichhuak leh ngei ngei ang che tiin ka kalsan ta a ni.kan țawngțai dun chu nuam kan ti dun hle a,Lalpa auhna tak tak kha kan neidun hle in ka hria.Lalpan a la chhanchhuak leh ngei ang tih ka rinpui a,ka ringhlel lemlo. LALPA THU a dah chungin ka kalsan zui ta a,Lalpa a innghat tlat turin ka chah a,ka ngaihtuahzui em em ta lemlova,Lalpan a ngaihtuah mai ang ti rilru chungin ka thlah ta a ni. He thu a ka han tarlan duh chu hei hi a ni.i chakna leh theihna in nge Lalpa i belh?Lalpa chakna ring mai ilo ni zawk le? I theihna in i ngamloh sual leh a hnathawh hi i bei thei meuh ang maw? Sang tak a mi chungtlâk hi a dik ber ang em?nge hniamte a dâwmkângtu ni tur ini? Sengkhâwmtu nge inih?tidarhtu?mi tan i thawk nge?nangmah intilansarh i tum zawk le? Lalpan chaklohna te hi Ama lova eng kan nihlohzia tarlan nan kan hma ah a lo ruatlâwk zawk em? Tlûkna hi awm lo tur emni?i tlûkna hi i daipelh palh nge?Lalpan i kawng tur a a thlansak che?i kawnglovah i kalin,i pêngbo nge?Lalpa a nunthar nei leh tur a tawrhna ruamah a awmtir zawk che?Lalpa puihna chauh ngai,engmah titheilo i lo nihzia leh Lalpa engkim Titheia thachakna rinchhan mai i lo nihzia i hriat nan zirtirna i hmachhawn zawk emni ang le? A tâwpber atan chuan hei hi ka han sawi ang e.rinna kawng a țhanglian zel tur leh hriatfiahna tam tak nei turin nun zirtir in i awm fova, tlûk leh din,chak leh chauh fâwm in i kawng i zawh a ni mai emni ang le tih leh kan nun hi Lalpa Thu a ni a,Lalpa min kaihhruaina dan ang ang kha i nun hman dan tur chu a lo ni thei ngei ang tih hi. Hei hi hre reng ang che.ringtu nunkawng a i kal zelna ah hian thil chi hrang leh mak tak tak paltlang tur i nei reng fova,chumi i kawng a huai tak a i kal zelna,Lalpa ring chunga paltlang ngai te huai taka i paltlangna kha hriatfiahna tak zawk a ni a,practical an ti a,heng a zir a zir thiamna hmang a hriatthiamna hi theory chu a ni a,a zir a zir thiamna kha a tak a nihloh avang leh tak nei anihloh avang khan malsawm tlak thunung a ni theilo.a thu a hriat chu a tak a dai chiah khan a lo fiah zel mai ta a ni. Thu a hriat kha a tak nei ngei a i paltlang hma chuan fiah takin i hrechuanglovang. USA khu thu in i hria a,internet lamah leh media ațangin awmhmunah i hmu a, i hre ve hle a,a hmuna awm ang maiin i sawi zal zal thei a ni.a hmuna awm a a tak a hmu leh hria,kal tawh ini hauhlo.khatiang hriatna ang kha a nghet em em lemlo.a bo duh.by heart system ang chauh a ni e.a tak a i hmuh leh kal leh hriat ngei,a tak(practical)a i tawnhriatna kha a nghet in a fiah a ni. Rinna a puitlin lam pan zelna kawng hi a thui hle a,i zawhna kawngah i hun hman pawh hun duh rei ve tak a ni tih erawh hailo la,i theihchhun Lalpa auh zel leh a Thu chhiar te hlamchhiah suh.a bak zawng chu Lalpa kut ah nghat tawp la,i nihlawh zel dawn zunia.Lalpan hun a tihleh i hun tih kha a inanglo hle ang tih hi hre tel bawk la,nghâk hram la,phunnawi lovang che. LALPAN MALSAWM CHE IN,THATNA TINRENG IN VUR ZEL CHE RAWH SE.AMEN

RINGTU NUNKAWNG PART-5

RINGTU NUNKAWNG PART-5 ◈◈◈◈◈◈◈†◈◈◈◈◈◈◈ Based on a True Story ▲▼▲▼▲▼▲▼▲▼▲▼ Chu zan vawt tak hnuaiah chuan pa pakhat hian ding khur dar dar leh vawt ti tak chung chuan mi inkhawm kallai chu ngawi reng hian a lo en reng mai a,chutia inkhawm tur a an han kal sang sang mai chu hmuhnawm tihhmel tak hian a lothlîr reng mai hi a lo ni a, engmah erawh a sawi lemlo. Chutia kawngsir a inthlahrung tak chunga loding ngawi reng chung a mi inkhawm kal a lo thlir reng lai chuan,țhian dun inkhawm kal tur chuan an lo hmuhhmaih hauhlo mai a,chu pa lampan chuan an va kalhnâi a,a bul an va thlen chuan a dum suite in a lo inthuam tih an va hmu a,a bulhnai chêt ah an va dinchilh a,zurim hi a lo nam vang vang mai hi a lo ni a, a hmelah chuan beidawnna leh lungngaihna hmel leh țanpuitu hmel zawngru hi a ang ber a ni. A hawivel ruai ruai a,a tawng silo,chu Biakin a kalte chu mițha tak annih ngei ringin an țanpui ngei a ring a ni.chu țanpuitu duhna a a lokhahna chhan chu a nun ning em em, amah a kal ngaihna hrelo, talchhuah duh si,amah a thei silo,tuilairap a awm mek, Pathian chhandamna duh hi a lo ni a.Lalpan a chhandam duhmi leh chhandamna chang tur a ruatlâwksa diam leh chumite ho chu intawng tur sa ni tur a ruatlawksa diam ang mai hian an intawng remchâng em em mai a ni.chuan,chu thiandun inkhawm kal tur te hnenah chuan a nun a ninzia leh chhanchhuaktu tur a mamawhzia a lohrilh a,chu inkhawm kal te lah chuan ngaihsak nachang hrelo hial a an kalpelh zut zut si zia leh a harsatna sawi ngamna tlâk a lo zawngru reng mai hi a lo ni a, chu țhiandun inkhawm kal tur, a bula awm ve reng,ngun tak a a chanchin lo ngaithlatute chuan Krista chanchin leh a khawngaihna nasa tak leh hmangaihna a khat anih thu an han hrilh chuan,a mittui hi a far lo chauh mai a ni.chu Isua,a chanchin min hrilh chu nangmahni ang a midang ngaihsak leh țanpui duh mi a ni emni!?tiin a han zâwt ta phawng mai a,chung mite chuan chhân ngaihna hrelo hial hian an hawi ka hau mai a, aw ni e han tih mai âwm tak nimahsela,tling an inti bik hauh silova,nimai thei asin tiin an chhâng a,an han nuiho dar dar a,chuan,a tawi zâwngin aw.a sei leh tawh lutuk dawn e.inkhawm ve a duh leh duhloh an han zâwt ve a,a zu in avanga a inthlahrun zia leh chu inkhawmna in a chhandamtu hmuh inbeisei si a lo inkiltawih ru tak si,mahsela,chu a harsatna a chhuah duh si chu a lo ni reng bawk si a,a aw ngam mailo na in chung mite chuan an hruailui ta nge nge a, inkhawmna inah chuan an han țhu chu zurim nam chu hriat hmel hlawm tak hian phunru sep sep chungin țhenkhat chuan an hnâr an han lên vêl ang ruai a,chu zu ruipa chu a inthlahrun phah hlau in chung mite chuan an țhutpui a,an be reng a,amah an ngaihsak a ni. Chuan,chu an țawng reng ri te chu kham hmel tih hriat tak chuan chu inkhawmna in a midangte chuan awmdan mawi intihre bik ang ziazang hian an melh leh ang hrek hrek a,chu chu hre ru reng chung chuan hrelo ang hmiah hmiah mai an ni thung a ni.tichuan,thuhriltu in thu a han sawi chuan ngaihthlâk nuam ti tak mai chuan a lo ngaithla a,thusawi zawh a inhlanna an han siam chuan a dingchhuak ve ta hlawl mai a ni.chuan,chung țhiandun te chuan a luchunga kut nghat in an țawngțaisak a,hlim em em in an inthlahliam zui ta a,a tûk ah chuan an kohhran hruaitupa chu zu lengin a zu kâwm a,hmel hlim tak a lo bia in Isua chu a Lal leh Chhandamtu atan a lo pawm tawh thu in a lochhang ta a ni. Awle,he thu a langtlang sa chu chhandamna chang tur mi hi ruatlâwk rêng an lo ni nge, chung mite hnenah chuan Lalpa chu a inpuang mai țhin emni tih leh chung mite chu chhandam annih theih nan a an hnena Krista chhandamna Thu hrilh turin Lalpan a tir che a ni mai ang em tih hi ni se, A dawtleh atan chuan i bulhnai leh i vel amite,Krista chhanchhuahna chang duh em em si,Krista hming a puih ngai kha i kova tla a nilo nge ni a hre lovin i lo pel fo mai em tih hi ka han zawt duh che a, Krista nunmawi leh chanchin țha nangmah ah khan hmuh an châk țhin a ni.tih hi nang leh kei ringtu nun nei tawhtu tan a inzawh nawn fo tur ni a lang chu niin i lo hre ve tawh mial em? LALPAN I HNENAH NUNNA IN THAWK MAWLH RAWH SE.AMEN

KHITA HMING AN LAM HUN CHUAN-PHUAHCHHAN

KHITA HMING AN LAM HUN CHUANIN KA AWM ANG (When the roll is called up yonder I'll be there) Kum Za zet a liam ta...... James Milton Black chuan Pathian rawngbawl hi he khawvela a awm chhan a ni tih a hriat chian em avangin Rawngbawlna chu mut mawh hnar mawhah a neih a. Mahse a hnathawh chuan a duh khawp a thleng hleithei thin lo. Thahnemngaih lutuk avanga thawpik up up chang a ngah thei hle. A rilru kaptu lian ber chu an khua Williamsport thalaite Lalpa ke bula hruai a ni. A taksa pawhin a chauh phah hle thin. Tuk khat chua Biakina a tawngtai haw lam kawtthler reh lai tak a paltlang lai chuan a rawngbawlna chu a chhut let neuh neuh a. Chutih lai tak chuan hmeichhe tleirawl, thawmhnaw hlui lam tawh inbel hi amah tawk zawngin a lokal hnak hnak a. Chu tleirawl chu a hmuh hnu ni mahse Biakin lamah chuan a hmu ngai hauh lo tih a hre chiang. A sam chu khuih mam a ni lova, a taksa lang lai leh a hmel chu a dawldang hle. A chezia hrim hrim pawh a inthlahrun hmel nghal ringawt. Chu tleirawl chuan James chu melh zak zak chungin kawngsir lamah hel a tum a. Mahse James-a chuan a be chak ta tlat mai. Dam diai hian 'Mami, i tha em?' a han ti a. Tleirawl chuan chhang mai lovin a tawi hrat hrat a. "Mami, i hming min hrilh thei em!' a tih leh takah chuan tleirawl chuan mi nelawm leh hawihhawm tak a ni tih hria in "Ka hming chu Bessie a ni e" a ti ve ta a. Pu James chuan Bessie chanchin chu a zawt chiang ta. Bessie i'n a chanchin a sawi chuan Pu Jamesa rin dan tawk vel a ni. Bessie pa chu zu ngawlvei a ni a. A nu chu a hrisel loh em avangin hna pawh a thawk hleithei lo va. Bessie chuan a thiam leh theih ang angin an chhungkaw eitur a dap chawp ve thin. A theih ang anga eitur leh sum hmuhna a zawn avang chuan ruk te pawh a ru hial thin a ni. Pu James-a'n engvanga Biakina kal ve ngai lo nge anih a han zawh chuan Bessie chuan Inkhawm a chak ve thin thu leh, ralkhat atangin an zai ri te a lo ngaithla in a thiam ang angin a lo zawm ve thin tih te a sawi a. Mahse an dinhmunin a zir mawlh loh vanga inkhawm ngai lo anih thu chu a sawi ta keuh keuh a. Mi tumruh Pu James chuan Bessie chu Inkhawmnaa tel ve ngei turin tihtakzetin a sawm ta a. Bessie pawh chuan hreh tak chungin a pawm ve ta a ni. Sunday a lo thleng a. Bessie pawh chuan a thawmhnaw neih that ber ha chhuak ve in Tleirawl inkhawmna hmun chu a pan ve ta hna hna a. Pu James a'n a lo hmuh chuan a lo dawngsawng vat a. Midangte nen inhmelhriattirna a nei zui nghal a. A thiante pawh chuan an lo kawm tlangnel ve thuai a, nuam pawh a ti hle. Chu Sunday atang chuan Bessie chu hming lamna bu ah ziah luh a niin a hming an lam apiangin phur takin *AWM* a ti ve ta lauh lauh thin. Chutia thiante zinga Pathian faka hlim taka a awm thei chuan Bessie hringnun pawh a ti danglam nasa hle a. Sunday apiangin Inkhawmna ah telin Sunday lo thlen hlan mawlh a nghakhlel thin. . *Khawiah nge BESSIE ??* Sunday a lo thleng leh ta. Tleirawl rual chu hlim takin an zai leh ta tuarh tuarh a. Pu Jamesa'n hming a lam leh ta lauh lauh mai. Mahse a tawp bera Bessie hming a lam chuan phur taka AWM lo titu an awm ta hauh lo. Pu James pawh a hrilhhaiin a rilru a khingbai hle. Zirlaite zingah Bessie chanchin hria reng an awm si lo.. Inkhawm ban veleh chuan Pu James-a chu rilru khingbai takin Bessie te In lam a panin a liam nghal ta vang vang a. An in a thlen dawn tep chuan Bessie pa zurui kal pai tuang tuang a hmu a. Inchhung a va luh chuan zawi deuha Bessie nu chhuata lo thu hnenah chuan "Khawiah nge Bessie? "a va ti nghal phawng mai a. Bessie nu chuan Bessie chu a dam loh chauh em avanga khuma a mut thu a lo hrilh nghal a. Pu James chuan Bessie khum lam chu panin chau taka Bessie lo mu bem chu a va hmu thuai a. A pang an khawih sak chuan a lo sa vur mai a. "Bessie, vawiinah i rawn Inkhawm si lo va. i hming kan lam laia phur taka AWM lo ti thin i awm ta lo chu kei leh i thiante kan hrilhhai teh asin" a ti a. Bessie chuan, "Ka pu, ka taksa hi a na in ka chau em mai a, ka rawn inkhawm peih ta lo a ni. Ka pu, Isua hnena ka kal hun hi a hnai tawh hle in ka hria" a han tih chuan James chuan theih tawpin a lo tawng thlamuan a. A hnu deuh ah chuan Bessie chuan "Ka pu he leia ka hming an lam laiin AWM ti thei tawh lo mah ila, khitah Vanah ka hming an lam hun chuan AWM ka ti thin tawh dawn asin' a ti ta a. Pu James a hmuh lai reng chuan a chatthla ta riai riai a ni. Pu James chu a hnuk a ulh teuh a, a mittui a sur zung zung mai. Bessie tawngkam chu a bengah a ri nawn leh thin. "Khita hming an lam hun chuanin ka AWM ang" Nikhat chu James Milton Black chuan a rawngbawlna te chhui kirin a mitthla ah Bessie a rawn lang nghal a. A rilrua Bessie awm reng chungin Van lam ngaih hla sak tumin Piano bulah a thu ran mai a. Mahse chutiang lam hawi hla chu sak tur a hre ta hauh lo mai. Aw zawite fiah tak si hian, "Nangmah ngeiin phuah rawh" a rawn ti a. A ngaihtuahna nasa tak sengin khawvela hla lar, chuai thei tawh lo tur KHITA HMING AN LAM HUN CHUANIN KA AWM ANG tih hla hi a phuah chhuak ta a ni. _Khita hming an lam hunin i awm ve dawn em?_

RINGTU NUNKAWNG PART-4

RINGTU NUNKAWNG PART-4 *****☆♡☆***** Tuarna leh chânna ațangin ka Lalhmelțha ka hmu. He thu ka han sawi tur hi kan têtlai a kristian naupang a an rawn tarlan kha a ni.a thu a țha ka ti em a,RINGTU NUNKAWNG PART-4 a khunglen atân ka ît riau mai a ni. Awle,ka han sawilan leh duh chu Bible châng piahlamah pawh hian midang nun ațang hian thuțha leh ril tak,nun chawktho thei leh nun kaihruai thei thu hi a lo inphûmru ve reng tho mai a lo ni fo mai tih hi tute pawn a kan lo hmuh leh hriat fo tawh țhin a nih avangin chulam hawi chuan thawnthu(True Story) ațangin han tarlan tum leh dawn teh ang aw.a thuhrim in thawnthu țha leh inkaihhruaina țha ațang pawh hian midangte nun a lo siamţhat ve theih ngei fo țhin avangin chumi beiseina chuan Bible châng lam ațanga beihvak lokham tâwk te tan ka han tarlang duh a ni e.Bible chhiar ning em em si,thawnthu lam leh thuțha tuipui tlur mai te hi awm ve theih ania.chumi lam hawi chuan kan thu kan han keuhthal leh tawp mai dawn a ni. Sapram thingtlâng khaw pakhat ah hian chhûngkaw pakhat hi an awm a,an nu chu Pathian ring mi em em mai hi a ni a,țawngțai ngaina tak leh fate tan a nu nih tlingzo tak mai kan tih ang hi a ni.fapa pakhat an nei a,a fapa chu a theih ang tawk tawk in Pathian Thu te hrilh in Bible a entirna atana an hman ho,mi hming lang ho kha a thurchhuak a,a chhiar sak fo țhin a ni.mahsela,an pa ber ve thung erawh chu zu ngawlvei a ni thung a,an chhungkua hi mirethei ve tak mai an ni nghe nghe.chutih chung chuan an pa ber chu nitin a eichawp zawng a inhlawhfa țhin mah nisela,a zu ngawlvei avang chuan tlaitin deuhthaw hi a rui ziah a ni deuhber a,an chhungkua an retheih tawh nâk alaiin a zurui chuan inchhûngah buaina a siam fo mai țhin a ni. A thawhchhuah a a hlawhchhuah chhun lah chu zu man ah a hmangzo lo chauh a,an chhungkaw eikhawp che che tak meuh meuh hi an hmu a ni ber mai.a bak chu zu manah a hmang deuh vek a,an nu hian a theih ang angin a lo hlawhchhuak ve bawk a,chulah chu a hnathawhloh karin zu manah a hmansak fo bawk. An pa zuheh leh chhungkua a buaina a siam fo tuarlovin an nu chuan he khawvel hrehawm tak a a khualzinna ram chu lo chhuahsan ta in,a nun hrehawmna lak ata,chatuan Lalpa khawngaih leh hmangaihna rûnnuam chu a lo belhsan ta a,a fapa chu a kalsan ta a ni.a thih dawn chuan a fapa chu Lalpa hnen a awm tlat tur leh Lalpa ring chung a a pa zurui țhin a lo pianthar phahna tur a țawngțai a dil fo zui zel turin a chah a,a chahthlâksan ta a ni. Chuan,chu naupang khawngaihthlâk tak mai chu a theih ang ang a lehkha te zir in school a kal ve țhin a,a pa chuan a zuruih apiangin a tiduhdah țhin a ni.buaina a la siamchhunzawm zel a,engemaw hlek ah a thin a rim thut zel a,a fapa,a nu in a thihsan tâk, khawngaihthlâk tak mai,a theih ang ang a inzir ve bek bek lah chu a sawisa deuhreng mai a,a zurui thinrim thut inhrîkthlâkna a ni ber mai a ni. Vawikhat chu an khua a an bialtu pastor hi bial fangin a kalkual a,tlailam a ni tawh a, khua a nuam vaklo nghe nghe a ni.ruah hi a tla deuh chep chep a,chuvang chuan hmun pakhat, râpin țha vaklo,ran chaw dahkhâwlna ni ngei tur ah hian a châwl lût hlawl mai a,chutia a chawlhluh chuan buhpâwl kâr a naupang khawngaihthlâk tak mai,thi deuh leh pem hnuang mai a lo awm chu a va hmu ta a, mak tiin a phâwk hru nghe nghe.chuan a han enchiang chu an biakin a lo inkhâwm ve ţhin naupang kha a lo ni reng mai hi a lo ni a,mama engtizia nge heta thi kai hnuang leh chauh hmel tak a i awm tiin a han koh vak vak a,chu naupang khawngaihthlâk tak mai chuan thei leh theilovin chu pastor chu a rawn melh țâwk țâwk a,a meng peih manglo tawh hial mai hi a lo ni a,chuan,chu naupang chu tui te pe in a han tiharh ta deuh a,ti mai ang aw. A chau chhe hle tih kha ka sawi tawh kha.chu naupang chuan thei leh theilo hian chu pastor chu a rawn chhâng ta a,a nu chu a pa zuruih tuarlovin Pathian hnena a kal tawh thu leh a pa zurui in a tihduhdah zia leh a vuak nasat zia te, school kal thei lova a siam fo mai zia te chu a sawi ta a, pastor chuan kal rawh,ka inah ka hruai ang che nga,i awm ang a,kan in ațangin thlamuang tak leh nuam ti takin school i kal ang a,i lo len a,hna țha tak i thawh thlengin ka enkawl ang che.nupui fanau duhawm tak te neiin chhungkaw țha tak i la din ve zawk dawnia.a ti a, mahsela,chu naupang khawngaihthlãk tak mai chuan a tlin tawhlo tih hriat tak mai hian a rawn thaw hlawp a,a rawn meng leh peih deuh a,chu pastor hnenah chuan ka pu,khi ka kalna tur a min hruaitu tur te an lolang tawh a,ka nu hnenah a biak țhin Pathian hnenah ka kal dawn a,khi a êng lutuk,a nuam lutuk ka kalna tur khi,chumi hma chuan hla ka sak i rem ti em tiin chu pastor hnenah chuan a ngen a,chu Pastor chuan aw sa rawh,enge i sak duh le!?a ti a,Isu,zaidam leh nunnem,naupangte min enkawl la,ka âtna min ngaidam rawh,i hnena min kaltir rawh tih kha a thunawn thleng a sa a,a rawn thaw hawk a,a zal ta riai riai a, a chatthla zui ta a ni.chu Pastor chuan a en tlawk tlawk a,a mittui hi a sur hian a sur zung zung mai a ni.a lainat in a khawngaih hle a ni. Awle,chumi hnu tileh daih tawh mai ang,a sei dawn ta tlat mai. Chuan,chu naupang khawngaihthlâk tak pa pawh chu a lopiangthar zui ve ta bawk a ni. He thu hi ka hre vek seng ta lova,ka theihnghilh țhen tawh bawk.ka theih ang angin ka han tarlang ve duh a ni e. Awle,heta ka han sawi duh chu,hemi khawvelah hian sual vangin chhungkua ah emaw pawh lo rûm mah ula,sual vangin tuar mah ila, he khawvel i zinkawngah hian sual avanga kan tawrh pawh phal a ni.chumi a chhel tak a Lalpa hnung i zui zel phawt chuan,khita van hmun a tlante an zaina hmunah khian i hming an la lam ve tawh ang a,he khawvel thimna leh hrehawmna hnutiang chhawn hlen tawh turin i la han awm ve tawh dawnia. He khawvelah hrehawmin in awm țhin,nimahsela, thlamuang takin awm rawh u,keiin khawvel ka ngam ta tiin Lalpan min lo hrilh hi a rintlâk em em a ni. He khawvel a hrehawm kan tawrhna hmunah pawh hian Lalpa avangin kan thla a muang a ni.Lalpa avangin hrehawm tuarlo mahla,i sual avangin hrehawmna i tuar tho tho ang.chu chuan a hnuleh ah engmah hlawkna a keng tel velo.Lalpa avanga hrehawm i tawrh emaw,i hrehawmna hmunah pawh Lalpa i phatsanloh chuan chumi tuarchhuaktute tan he lei ah malsawmna dah a ni a,thihhnu ah a aia ropui an la chang ngei bawk dawn a ni. LALPAN I NUNAH THILTIHTHEIHNA IN KALTLANG MAWLH CHE SE LA, LALPA A THUNUNG ROPUI HI MALSAWMSAK MAWLH CHE RAWH SE.AMEN

LALPA MIN PEK KA HLA TE-3

Hrehawm tam tak tuar a Pathian ram lût tur kan ni.(Tirhkohte Thiltih,14:22) 1. Hrehawm tam tak tuar a Pathian ram lut tur kan ni,tuarna leh chânna te hi kan tan țhianțha. 2. Ka Lalpa min kohna ah chuan ka kal zel ang,hmuhsit, sawichhiat,elrel tâwk țhin mah ilang. 3. Krista hnung zuina kawng hi kawng awlsam a nilo,kraws tuarna paltlang nun a lo ni zawk si. 4. He lei ah lungngaiin, mittui te tla rih mahse,nakinah kan lawm a la kim dawn si. Composer: David Da Lord's Hover Renthlei

LALPA MIN PEK KA HLA TE-2

Kei zawng rethei leh pachhe tak ka ni a, Nimahsela LALPAN mi ngaihtuah thin a: Nang chu mi tanpuitu leh mi chhanhimtu i ni a; Aw ka Pathian, rei rial lul suh ang che. (Sam 40:17) Lalpa chu min vengtu a ni a,ka tlachham lovang.sam,23 Thinlung thar ka pe ang che u a, in chungah thlarau thar ka dah ang: in tisa ata thinlung, lung anga sak chu ka la bo ang a, thinlung, tisa anga nêm ka pe zawk ang che u. (Ezekiela 36:26) Thlarau tihnuamin min chelh reng ang che.(sam,51:12) BEISEINA NUNG NEN KA RAWN PAN A CHE. 1. Beiseina nung nen ka rawn pan a che, Nangin min ngaihtuah tih ka hriat vangin.Nangmah nen a lêngdûn zel turin, tunah i lam ka lo hawi e. He ka khualzinkawng khawhar ah hian, beidawnna,manganna ten min hualvel a, lungngaihna chhûmpui zing a kian hma chuan,aw Lalpa lungngaihna a zual zel si. 2. Ka hma ah sual thlipui an hrâng mêk e,Lalpa i țanpuina ka ngai a ni.hnehna nun ka neih zel theina turin,Thlarau Thar, Thinlung Thar min siam ang che. 3. I Thlarau Thianghlim in min hruai zel la,i chhandam hlim leh lawmna min pe leh la, i duhdan te zir zel thei turin,Thlarau tihnuam in min chelh reng rawh.

LALPA MIN PEK KA RINNA KAWNG A KA HLA PHUAH-1

AWM KHAWHAR CHÂNGIN KA DÂWN THIN composer: David Da Lord's Hover Renthlei 1. Awmkhawhar chângin ka dâwn țhin,Berâmno tuallênna, Lungngaih awm tawhlohna hmun chu, thlen ve hun aw..!!ka nghâkhlel. Aw..!!Isu min kai ang che,he khawvel damlai kawngchhukchhoh ah hian,keimah mai chuan ka kalthiam love,sual a tlu in ka chau leh țhin. 2. Ka rûmna thlalêr ațang hian in,chhantu ka ngai,ka vân ruai ruai a,min hnêmtu leh min muantu an awmlo, sual a tlu in ka châu leh țhin. 3. Hun leh ni te lodang zel mahse, chau a tlu mai tur kan ni silo,sual dorâl leh thlêmna tinreng te, hneh zel turin hmalam i pan zel ang. 4. Kan zinkawng a lo tâwp hunin,kut a sakloh khawpuimawi khi,ringtuten kan la thleng thuai dawn, hringchan khawvel hnutiang chhawn in. Hei hi ka pianthar hma leh pianthar hlim a ka nun lokal zel a ka phuahchhuah a ni.ka duh em em bawk.a hla thu hi han bihchian chuan hringnun beidawnna hlimthla leh ringtu nun a chhel tak a sualdotu nun tarlan chian a ni a,a hnu a chumi a hnehna chang tawhtute tan a hringchanna ram, khawvel an lo chhuahsan hun chuan,khawpuimawi lam pan a hringchan khawvel hnutiang kan la chhawn turzia in ka khâr ta a ni.thih hnu thlarau khawvel a hmun nuam leh ropui,kan Lal lênna rûn khi kan ngaihzia pawh ka tarlang tel bawk e

PATHIAN INPUANDAN OLD TESTAMENT LEH NEW TESTAMENT AMITE KHAIKHINNA

PATHIAN INPUANNA-THUTHLUNG HLUI LEH THUTHLUNNA THAR KHAIKHINNA KEIMAH A A FIAH DAN [02/09 9:01 AM] : Engvanginnge Pathian hi Thuthlung Hlui hunlaia a tak a a inlan fo a,tuna a tak a inlar kan hmuh tâkloh nachhan tih hi nizan ka bethelna rahchhuah nge ni, tûkin ka thochhuak chu pêkfiah in ka awm ve tlat mai. Thuthlung Hlui hunlai chuan tun ang hian bible hi a la awm veloh avang khan Pa hun kan tih ber ah khan a takin vantirhkoh hmang te,chhûm leh aw hmang ten a inlan ta mai niin a hriat a, Fapa hun kan tih ah khan Fapa chuan a takin,Pathian ropui tak aiawh in mihring taksa ngeiin tlanna hna a thawk leh a, Thlarau Thianghlim hun kan tih ah hian Thlarau chuan kan chhûngah a Thu te chu dah in hriatfiahna kan lo nei ta a,Bible a awm ta bawk a,thuhriltu te an lo awm tãk hnu hi chuan hei hi Pathian chuan a tak a inlan aiah aiawhtu atan a ruat ta ni ber in a lang a ni. Bible chu Pathian thâwkkhum a pêk anih miau si chuan Amah Pathian ațang bawk lo chuan hriatfiahna tak hi fullfil in kan chang theilo.chumi awmzia chu nang leh kei a khawvel thiamna zirfiahna hian sawngsahlawtna riltak a nei lemlo tihna a nih ber chu [02/09 9:05 AM] : Bible i chhiar leh thuhriltu thu i ngaihthlâk te,sawihona leh țawngțaina te kha Pathian ropui tak inlarna vek ni thei ta chu a ni a,kan chhunga Thlarau inlarna kan chan te nen hian Pathian nung ropui inpuanna vek a ni tih hi a lolang chiang ta hle a ni. I awih mial em?

RINGTU NUNKAWNG PART-2

RINGTU NUNKAWNG PART-2 ☆<><><>†<><><>☆ Ka țhianpa pakhat thusawi kha ka hre reng mai a,vawikhat chu lungngai leh khawhar a mangang tak mai a ka awm lai chuan ka hun hmalam tur ka thlir țhin,thim hlir hi ni ber in ka hria a,ka mangang hi ka indawmkun a,ka mittui hi ka hriatlohlai in ka biangah a loluang thla ngiai ngiai mai hi a lo ni reng mai a,mak ka ti hle a,ka han hru fai a, chutia ka hun hmalam thim chhah mup,kal ngaihna awm silo chu ka rilru hi chhun ang a na hian leh chemte a vihtlang reng ang mai hian a awm a, tihngaihna reng ka hrelo.chutia ka inngaihtuah mek lai chuan ka lo inngaihtuah muhil nge ni,ka lo muthlu diar diar a,chuan,ka mumangah hian Isua hian milo bia a,mi lo thlamuan a,a hmel chu nisat vanglai ang mai hi a ni a,a sam rawng chu rangkachak rawng ang,tlesiau mai,fai leh thianghlim tak a ni.țhuiloh kawrfual vâr a ha bawk.a nunnem in a ngainat awm em em mai bawk a ti.chuan chumi hnu titawh mai ang,ka bengah hian chiang em em leh min hrilhtu awm ang mai hian aw ri ka hria a,ka thinlungah a chiang hle bawk si a, a thlum veng veng mai tih a sawi a, mihring țawng ri ang ni silo,aw nêm leh zaidam aw,aw mawi leh ngaihno bei tâwp in mi lo bia a,ka harh zawk nghe nghe a,mi be tu chu ka hmu hauh silo,ral leh ta riai riai ang hi niin ka hria a ti.chuta a sawi chu hei hi a ni,Bible a ka nunna engahnge i kun reng,Pathian beisei rawh,a hmel a damna awm avang chuan,Amah chu ka la fak dawn si a,tihlai thu kha a ni.a ti.ka thu hriat leh aw hriat ah a la mawi ber ãwm e.ka mangan vâwrtâwp,intihhlum pawh duh hial a ka awmlai a min betu aw mawi leh nalh tak leh nelawm,thlamuan thlâk kha he khawvelah a awmlo ang a ti tawp mai a ni.chuan,lungngai a ka indawmkun rengna kha engdang a lo nilo,Lalpa min ruatsak,ka nunkawng tur zawk a a ruat kha ka hriatloh anih avang leh Lalpa lam en lova leilam hlir ka lo en vang mai a lo ni tih ka han hria a, Lalpa min ruatsak chu a țha ber a lo ni tih kha ka han hrefiah ta a ni tiin a sawichhuak a ni. Awle,aw nang ringtu duhtak,harsatna leh manganna hmunah han awm tak tak ta la, Lalpa nge i rinchhan, he khawvel a i huntawn mek harsatna thim chhahmup kha i en reng mai zawk le? Kan han hlim a, lawmna te kan han tawng a,Lalpan a Thlarau avangin kan nun a tilâwm a,ka tih ve thei ta emaw tiin kan han chapo ve thla ngawt a,kan tithei,kan ti tur a ni, kan tih hi Lalpan a phût kan han ti phiar phiar ngam mai hi chu a zialo angreng hle a ni.Lalpa Thlarau pawlna che kha reh ta se,harsatna vawrtâwp tuarin chau in rum ta la, Lalpa lam aiin he khawvel lam i thlir reng ang a,Lalpa rinchhan aiin sâwt chuang silovah i indawmkun reng mai ang.tih hi a langtlang sa vek a ni Mihring hian tlûkna awm achin kha Pathian ringthei nun amah ah a kawl tawhlova,rûksak leh tihchhiatsakin kan lo awm tawh a,Lalpan min hmangaih tlat si avang leh chatuana kan boral a phalloh avangin a FAPA a rawn tir a,sual reng reng hrelo FAPA chu misual ah a siam ta a ni.khawvel a chhandam a ni. Chatuan a kan nun theih nan Hetah hian Thlarau zarah Lalpa kan rin theih nan kan chhungah Lalpa lama hip a kan awm theih nan Thlarau chuan kan hnenah hna a thawk zui ta a,chuvangin Lalpa ring thei tawhlova thi tawh chu tihnun in kan lo awm ta a ni. I harsat hun leh i mangan hunah te,i peihna leh phûrna a sosan na zawng zawng a lo reh hun a Lalpa i phatsan leh mai dawn avangin khami huna Lalpa lam a hip a i awm leh theih nan a i tlu kaitho tur che in Thlarau Thianghlim chuan hna a lo thawhsak leh dawn che a ni. Lalpa ring theilova leilam thlir reng mai nun nei tawhtu chu Lalpa lam thlir zel thei tur a kaihhruai zel i lo ngai ta a ni. I hlimlai chauh a Lalpa bel țhin inih leh i hlimloh leh peihna leh phûrna a lo awm tawhloh hunah Lalpa lam en lova khawvel lam thlir leh tur a Lalpa i hnungchhawn hlen leh mai loh nan puitu chu i na tawrhna hmunah a lolang leh ngei dawn a ni.chumi avang bawk chuan,Lalpa thiltih i chan avang bawkin Lalpa i hnaih thei dawn tihna a nih chu. Unau duhtak,leilam thlir lova vanlam chauh thlir zel thei tur a Lalpa khawngaihna hlutak changtu lo ni ve ang che.i hlim ni a pawltu che ngei kha i harsatna tawrhna hmunah puitu a lo ni leh ngei dawn a ni. Chu nuntak thurûk chu i lo kawl ve tawh em? LALPA CHAKNA THAHRUI RINGTU LO NI ZEL FO ANG CHE.GOD BLESS YOU

RINGRU NUNKAWNG PART-3

RINGTU NUNKAWNG PART-3 #*#*#*#*†*#*#*#*# Misual tak pakhat hi damdawiinah natuar in a awm a,thih ngam in a na a,chutia natna tuar leh thi mai dawn a a awmlai chuan,chu hmunah chuan rawngbawltu hi a lokal hlauh mai a,damlo a țawngțai a ni.chutia damlo kan leh țawngțai a a lokal chu mak tak mai in an in tawng fu nawlh mai a,Pathian ruatsa anih ngei a rinawm a ni.Lalpa ta tur a ni nge pheichu hriat nilo mahsela, ni theiin a lang tlat mai,an intawng ngei tlat si kha mak ve tak chu a ni.Lalpa chhandam duh mi a lo nih ngei a rinawm. Chutia an intawnfuh tâkah chuan rei ngial chu an in councelling ta a,Lalpan misual pawh a fate an ni vek a, Amah ring duh leh ring thei apiang a chhandam mai tih kha a hrilh a ni.chutia a hrilh lai mek chuan chu damlo thi lek lek chu a mit ațang chuan a biangah mittui a lo luang ta ngiai ngiai mai a, lawm avang a ni.chu rawngbawltu chuan a thusawi tlemte mai leh a Bible châng chhiar,Pathian in khawvel a hmangaih em em a,....tihlai thu a chhiar Lalpan chumi darkar tam pawh nilova chu misual damlo ti mai ang.kan hriatthiam nan aw.hnen a mal a lo sawm duh hlauh chu mak a ti in leh angaihna hrethiam lovin a hamhaih letling zawk a, chu damlo thi lek lek, khawngaihthlâk tak mai chuan ti hian a rawn sawichhuak ta a,"Ka pu,kei misual tak, țhatlai hun neilova sual ti reng leh ruihhlo te ti țhin,sex lam a inhmang nasa tak leh rûk rûk hrehlo,nu leh pa te thu awihloh vanga an tuithlâr hial lo tâwk tawh hi Pathian i sawi chuan min la hmangaih ang maw!? A ti a,chu rawngbawltu chuan aw, hmangaih e,Lalpan hmuhsit a nei ve lova,thleibik a neilo, tupawh a lam hawi duhmi chu a lo khawngaih thei vek,sual tawh mahsela,an nunhlui a ngaihtuahlove,Amah an tawh ni tak leh hun tak ațang khan tupawh an hun lokal tawh kha sual hle mahsela,a theihnghilh sak hmak thei asin a ti ta a, kei misual hi min lo la hmangaih in, ka tan hunţha min lo pe reng a nimaw!?ka va han lawm ve le!!!!ka pu,ka sawi thiam hlawl silo tiin chumi darkar tam pawh nilo,minute tlem te chhung chuan Lalpa a lo chhar ta a,a nun êng lawmna hlir a khat cgu hmuh theih in a lo êng chhuak ta a,chu rawngbawltu chuan a hmuhhmaih hauhlo.tichuan, chumi hun tawite chhung,thih dawn a ruaiah chuan Lalpa chhandamna changtu niin a nun chu thlâk danglamsak in a lo awm ta a,a chatthla zui ta a ni. Bible a lang chu,uire nu leh nawhchizuar nu piangthar,a nun a LalIsua chhandamna chang khan sawibing a hlawh hle a,he nawhchizuar nu, LalIsuan a ngaihdam hian Alabasta bur a sawhkeh thu leh a sam a Isua ke a hrûkfai thu hi sawi hlawh ve tak pawh a ni a, saula,paula lo ni ta hian sawi a hlawh hle a,saula anihlai hun leh paula anih hnu inthlauh dan khaikhin a ni fo bawk. LalIsua hmangaihna chuan tumah thleibik a neilo,tupawh Amah ring duhtu chu a lo chhandam mai a ni.a ring apiangte tan chhandamtu a ni a,he khawvelah erawh kan inteh viau hle lawi si a ni.hei hi awmze neilo leh kan hriat zawh rualloh khawngaihna anih avangin sawi a inteh vak hian awmze riltak a nei lemlo a ni. LalIsua khawngaihna hlutak changtu hian a chan khawngaihna nasa tak hi a hnawl thei ngailo,a hnawl thei anih chuan,a changlo a nimai. Krista chhandamna huangah hian lenglo a awmlova,tiamchin leh ramri kham a awmlo kan ti a ni thei e,a ring thei leh theilovah ramri a inkham tih erawh tarlan chian a ni thung a ni. Lalpa khawngaihna chang tur hian tihbik an awm em hriat a ni lova,tiamchin erawh a nei thung a,chu chu ring thei leh theilo ah a ni. Krista chhandamna changtu chuan a chan khawngaih thilthlâwn pêk lawmawm tak kha a lawmpui zo em em a,a hnar phallo țhin zawk a ni.a duhlo theilo anih ber chu. Krista khawngaih chhandamna changtu chu a nun a inthlâkthleng satliah mai lova, nun danglam a chang thung mai a ni.tihlan tum lam a ni lova,Lalpan a huntakah a tarlansak mai zawk a ni. LALPAN I NUN AH THILTIHTHEIHNA NEIIN THÂWKKHUM CHE RAWH SE.AMEN