PATHIAN THU NAWI DANGTE

HAN TI LEH TEH ANG. Kan hun tawn zelah Lalpa hruaina chang zel turin Lalpa inpuanna kan chang zel fo em? Mahni indahțha a midang siamțhat tum kan lo ni fur mai em? I tun dinhmunah khan Lalpa ah lawmna i chang thar mek zel em? I nunna kha lo chuai ta se Lalpa ah chatuan nunna i nei tak meuh em? Hmasawnlo țhanțhu ringtu kan lo ni mai em? Midang hmuh a țhat tum a țan khawh, midang hmuhlohva sual pawisalo ringtu ka lo ni mai em? Semchhuah aiin dawnbelh țeuh ka lo tum mai em? Lalpa aia thlan zawk ka ngah fu mai țhin em? Mahni nun lam indahțha a midang nun teh reng mai ka lo ni em? Lalpa a lawmna hmutu nilovin,midang nunah lawmna zawngtu ka lo ni em? Ka peih leh duhtawk chin ah chauh Lal rawng bawl ka lo tum em? Pathian hnen ațanga malsawmna dawn belh zel nge ka tum? Ka dawn sa ah hian midangte tan ka luangchhuak ve zawk tawh dawn? Midangte hmuh a mawina zawngmi nge ka nih?Lalpa mithmuh a mawina zawngtu ka ni mek zawk le? Lalpa rawngbawl aia mahni nuam tih leh duhzâwng zawng mi ka ni em? Lalpa rawngbawl aia khawvel nawmchenna thlahlel mi ka lo ni mai em? Heti hian han inen ta la,midang nilovin nangma nun lam en țhin ta la,Lalpa neitu inih leh nihloh chu i nunah khan a chiang mai dawn a ni. Lalpa neitu chu engkimah an danglam țhin a,an mahni tumna leh țanlâkna nilovin,an chhunga awm minung ropui avang zawkin leh anmahni a nun danglam an neih avang zawkin chu nun danglam chu a hun takah midang hmuh in a lo langchhuak fo țhin a lo ni e Zantiang tawnmang ram zawngte chu zingțian khawvarah an lo thâmral leh thin a,suangtuahna rauthlalêng zawngte pawh mitkhap kâr lek chhûngin an lo thâmral leh țhin ang hian hringnun damchhung nun tawite pawh hlimthla iang kan lo la ral leh ang.hei erawh ka han hre chhuak leh ta a,ral ve ngailo tur nun hlu leh ropui chu, chatuan pialral thlen thleng a ka chan tur Krista tlanna ropui zar a pêk ka lo nih hi. Hlimna leh lawmna hriak nen a ka zinna ram khawvelah hian damchhung ni chhiarliampui tlâk thilthlâwn pêk a lo ni reng tih hi. Harsatna i tâwk em le?țanpuivartu hnai reng i kiangah a awm reng e. Retheih leh tlâkchhamna hmunah i awm emni? I mamawh tinreng pe theitu i kiangan a ding reng a ni. Hlauhna in i lo khat em?hnehtu ropui Krista i hnenah a awm. Lungngaihna leh manganna in a tlâkbuak che emni? Thlamuantu nung ropui hlimna pe tur che in i hnenah a awm. Damlohna in a tlâkbuak che em? Tidamtu Isuan a nghâk reng che. Misualber ti a chilchhâkna leh hliam i tâwk emni? Tlantu nung ropui in a thlir reng che. Tho la,i theihna zawng nen tunah Lalpa ringin țawngțai rawh.a chhâng duh reng che a ni. Mi au la,ka chhâng ang che,thil ropui leh inthup,i hriat ngailoh chu ka entir ang che. Isuan a ti.