HLUM BÊL A ROHLU

2 Corinthians 4:7 Nimahsela, thiltihtheihna nasatzia chu keimahni hnena mi ni lovin, Pathian ta a nih theih zawkna turin chu ro chu hlum belahte kan vawng a ni. He thu ah hian ro chu hlum bêlah te kan vawngtha thin a ti a,chu ro chu enge tih chuan,Pathian thiltihtheihna a ni tih a thu hmalamah hian chiang takin kan hmu ta a.chu thiltihtheihna chu Pathian ta ngei a ni a,chu chu ro hlumbêl a vawnthat angin an vawnthat tlat thu tarlan a ni.he thu a thil pakhat lolang ta chu hmanlai chuan an thilneih tha,ro chu hlumbêlah an dahtha in, an vawngtha thin niin a lang thei a,chu chu tehkhin nan a hmangin Pathian thiltihtheihna an hnena awm kha hlum bêl a ro hlu vawngthat ang in vawnthat tlat tur anih zia min kawhhmuh a ni. Galatians 6:17 Tun achinah hian tumahin mi tibuai tawh suh se; ka taksaah hian Isua chhinchhiahnate ka pu si a. He thu ah hian a taksa a Isua chhinchhiahna a put tarlan a ni a,kha a taksa kha chu lei a vaivut a siam a ni a 1 Corinthians 15:47 Mihring hmasa ber chu leia mi, leia siam a ni a; mihring pahnihna chu vana mi a ni.chu lei a siam vaivut ah chuan Krista Isua chhinchhiahna a pu tlat mai a ni.chu a taksa,lei a vaivut a siam ah chuan Krista chhinchhiahna ro hlu chu a awm ta a,chu chu kha a taksa hlum mai atanga dinah khan kha ro hlu tak,Krista chhinchhiahna a awm tlat si avang khan hlum bêl a rohlu a ni kan ti thei bawk ta a nih chu. Hrilhfiahtu thenkhat te chuan keimahni hi engmah kan nihloh zia leh keimahni hnena Krista lopiang emaw lo awm emaw ang pawn an sawi tho bawk a,chu chu Isua pianna mâri chungchângah khan tarlang tel lawk bawk ila,Mâri kha nula narân ve mai,tukhawkha hriatloh a ni a,mahsela, vân chuan nula thianghlim ah a puang tlat a ni.engvangmaw tih chuan,ka nun hian Lalpa a châwimawi e.ka thlarau pawh mi chhandamtu Pathian chungah a lâwm ta em em a a tih kha a ni.(Luka,1:46,47).kha nun kha Mâri chhûngah a awm tlat mai kha a ropui hle a,kha nun a neih avang khan nula thianghlim ti a vân in an pawm chu a ni tih a chiang ta reng mai a ni. chuan,adang leh ah chuan Josepha leh Mâri te chu mihausa leh neinung leh mite hriat hlawh a miropui tih a sawi tur an nilo chung leh mirethei,dai kilkâr ami ang lek an nih lai khan LalIsua,Pathian Fapa meuh pianna leh enkawltu,lei a a nu leh pa atana Isuan a rawn thlan chu an ni mauh mai si a,chuvangin,hlum bêl a rohlu tih ah hian hetiang lam hawizâwnga zeh tel hrâm tha in ka hre bawk a ni. Acts 3:6 Nimahsela Peteran, “Tangka leh rangkachak engmah ka nei lo; nimahsela ka neih chhun ka pe ang che: Nazaret Isua Krista hmingin kein kal tawh rawh,” a ti a. He thu ah hian an neihchhun Isua chu thiltihtheihna neitu a ni tih a chiang leh ta a,tangka leh rangkachak aia rohlu chu an neihchhun Nazaret Isua chu a ni a,chu chuan thiltihtheihna nasa tak a nei a ni. chutah an neihchhun Nazaret Isua chu tangka leh rangkachak aia hlu anih zia chu kha tangka leh rangkachak an pêk aia hlu, chu rohlu Isua Krista thiltihtheihna avanga a kutdawhna ata a dam tâk thu kha he thu a kan hmuh thil ropui lutuk mai chu a ni a, chuvangin,hlum bêl a rohlu ah hian kan zep tel leh hlek duh a ni. Psalms 40:17 Kei zawng rethei leh pachhe tak ka ni a, Nimahsela LALPAN mi ngaihtuah thin a: Nang chu mi tanpuitu leh mi chhanhimtu i ni a; Aw ka Pathian, rei rial lul suh ang che, He thu ah hian mirethei tak chuan ngaihtuahtu,ngaihsaktu Lalpa a nei a ni. chuvangin a neih Lalpa chu atân rohlu a ni kan ti lo thei lovang. Psalms 46:1 Pathian chu kan inhumhimhna leh kan chakna, Mangan laia tanpui vartu hnai reng a ni. He thu ah hian Lalpa chu atan chuan engtiklai pawh a tanpuitu leh a chakna leh a inhumhimna a nih si chuan atan hei aia rohlu hi a awm thei lovang. Romans 6:23 Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni. He Thu ah hian chatuan a nunna chu Pathian thilthlâwn pêk hi a ni a,chu chu a Fapa Isua Krista zâr a kan chan chu a ni. hei hi mihring tungchhova kal te rohlu ber chu a ni e.John 3:16-17 Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan. Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e. Romans 14:17 Pathian ram chu ei leh in lam thu a ni si lo va, felna te, remna te, Thlarau Thianghlima lawmna te a ni zawk e. He thu ah hian Pathian ram chu ei leh in thu lam a nilo,felna,remna leh Thlarau Thianghlim hnathawh avanga lâwmna te a ni.a ti a,chu chu mihring tungchhova kal tawh phawt tân a duhawm leh tha lutuk a ni a,heta hlum bêl a rohlu ah pawh hian thilneih lam sawina ang reng a nih avangin zeh tel a rem hle a,ka han zep tel leh hrâm duh e. Revelation 3:11 Ka lo kal thuai dawn e; tuman i lallukhum chu an laksak loh nan che i thil neih sa kha vawng tlat rawh. Heta thil neihsa chu enge tih chuan chatuana nunna a ni.John 3:36 Tupawh Fa ring apiangin chatuan nunna an nei tawh; nimahsela tupawh Fa thu awih lo apiangin nunna an nei lo vang a, Pathian thinur an chungah a awm reng zawk a ni,” a ti a. John 5:24 “Tih tak meuhvin, tih tak meuhvin ka hrilh a che u, tupawh ka thu hriaa mi tirtu ring chuan, chatuana nunna a nei tawh, thiam lohvin a awm lo va, thihna ata a chhuak a, nunnaah a lut ta zawk a ni. Tichuan hlum bêl a rohlu chu enge ni tih chuan Krista chu a hnuk pui ber a ni kan ti lo thei lovang,ka han tarlan tâk zawng zawng khi mah atanga chhuak vek a ni a, amah avanga awm vek a ni bawk.chumi ah chuan he lei taksa engmah nilo leh hlum(vaivut)atanga siam mai ni bawk ah hian hlum bêl a rohlu vawng tlat ang khan kan rohlu Krista a nuntak,chatuan nun kan neihna leh Amah a chhinchhiah a kan awmna chu kan vawng tlat tur a lo ni e. hlum bêl mai kan ni a,ro hlu chu Krista a ni si a.Hlum bêl chu a hlu teh vaklova,a chhûnga 1 Peter 1:4 rochan chhe thei lo, bawlhhlawh kai lo, chuai thei lo, vana in tana khek chu hmuhna turin;tiamchin lam chu i pan talh talh ang u.(Philippi,3:14)